Tekad, Tego Lan Tegel

Tekad, Tego Lan Tegel

" WeLinge Bapak "

nggèr anakku lanang.. kowé
pamit lunga menyang kutha golek
kamulyaning urip. tak pangestoni nggèr.
aku ora bisa nyangoni bandha, mung
bisa nyangoni donga. urip ning paran,
kowé kudu sing bisa golek kanca, awit
bakalé kancamu kui dadi sedulur. bot
repoté urip ing paran kui gumantung
saka anggonmu sesrawungan.
dadi wong jawa; urip iki kudu duwé
tekad, tégo lan tegel.

sing jeneng Tekad..

kui kowé kudu duwé semangat nggayuh kamuktèn. apa sing
arep mbok lakoni kudu ditata lan
dilakoni kathi tenanan. disranani donga
lan laku pikiran sing bening, yen kepingin
gegayuhanmu bisa kasembadan.

Tego..

opo wae sing dadi pacobaning urip
sak suwéné kowé nglakoni lelaku kang
tumuju ing gegayuhan kui, kowé kudu
tégo ngrasakké.. kepiye lakuné, kaya
ngapa larané, pait lan getiré kowé kudu
bisa ngecap kui dadi nikmat.

Tegel..

kowé kudu wani marang
samubarang lan sapa waé sing dadi
pepalangé tujuanmu.. sebab ukurané
kasembadan lan durungé gegayuhan kui
yo mung awakmu dhéwé sing bisa naker..

yèn ana sing gawé becik marang kowé,
sanadyan kowé ora seneng karo wong
kui, atimu kudu tegel nganggep dadi
sedulur,

kosok baliné,yen sedulur apa
kancamu wis wani sengaja nglarani lan
dadi pepalangmu, kowé kudu tegel
ninggalaké rasa wigah wigih. nanging
kowé uga kudu tegel nyindhet atimu,
supaya kowé ora gawé tatu larané
kancamu utawa sedulurmu sing wis gawé
riwet lakumu.. kowé kudu tegel karo
atimu, ora males ala marang sing wis
gawé ala..

eling nggèr, piwales kui
wewenangé sing Kuasa.. lemah lemah
teles, ala utawa becik Gusti Allah sing
mbales..

Sura Dira Jayaningrat, Lebur Dening
Pangastuti. samubarang sifat angkara
culika lan angkuh, bakal lebur dening
sifat lembah manah lan sugih
pangapura