JALMA LIMPAD SEPRAPAT TAMAT
Kanggone wong Jawa paribasan iki mesthine wae wis akeh kang nyumurupi apa tegese. Ya mung mbokmanawa ana sing durung mangerteni muga tulisan sepala iki bisa dadi wimbuh kawruh.
Jalma tegese wong utawa manungsa, limpad ateges mumpuni. Dene sing dikarepake JALMA LIMPAD SEPRAPAT TAMAT yaiku manungsa sing nduweni kaluwihan sing mumpuni. Ngibarate mung kanthi pituduh utawa pralambang sing ana, mung saperangan pituduh (seprapat), wis bisa ngerteni sakabehe. Kaluwihan kang mumpuni mau bebasane bisa ingaran "weruh sadurunge winarah".
Tembung paribasan JALMA LIMPAD SEPRAPAT TAMAT isih magepokan karo paribasan liya sing duweni teges meh padha yaiku PUNJUL ING APAPAK MROJOL ING AKEREP. Sing tegese, manungsa sing duweni kaluwihan utawa kacek tinimbang sapepadhane (pinunjul), bisa mrantasi gawe sakehing prakara lan tansah bisa uwal saka rubeda lan bebaya.
Jagad saisine kang ginelar iki akeh pralambang saka Gusti Kang Murbeng Dumadi. Kanggone manungsa sing limpad bisa maca bisa mangerteni lan maknani pralambang mau. Sing dikarepake ing kene dudu kayadene dhukun tukang ngramal. Nanging manungsa kang duweni kaluwihan bisa maca pralambang sing ginelar sadurunge kedadeyan. Yen dijarwaake nganggo basa umume mbokmanawa kasebut "Pandai memprediksi apa yang akan terjadi di masa mendatang melalui tanda-tanda isyarat yang terjadi saat ini".
Semono uga ing sastra lan budaya Jawa kang kebak sanepa, sasmita, pralampita. Kanggone wong sing limpad sanadyan iku sanepa, sasmita, pralampita kang winujud ing sastra utawa wujud apa wae wis bisa mangerteni werdine.
Nyumanggaaken
Nuwun.
Rinakit ing
Bogor, Senen Pon 220719
Lekik Wardoyo
0 komentar:
Posting Komentar